تحدث الفنان راغب علامة عن حياته الشخصية، وتفاصيل علاقته بـ زوجته وأولاده، وكذلك كشف عن موقف كوميدي جمع زوجته مع إحدى المعجبات.

وقال راغب علامة، خلال لقائه مع الإعلامية هدير أبو زيد في برنامج التاسعة: "العيلة نعمة من ربنا، وأنا بحافظ عليها، والفنانين معروفين عنهم كتر الزواج، وأنا حافظت على الموضوع، وجيهان ليها فضل على استمرار الحياة الزوجية، وحبي لعيالي خلق التماسك في المنزل، وولادي مش عيالي بس ولكن بقوا أصحابي، وولادي بقوا مطلوبين عالميًا كموديل وانفلونسر، وبتشارك في الآراء في البيت".

وأضاف راغب علامة: "جيهان بتتحمل ومعندهاش عداوة مع المعجبات، ويوم ما اتجوزتها قولتلها هتحبي المعجبات زي ما بيحبوني وبحبهم، وخليهم أصحابك وحبايبك، زي ما هم أصحابي، وده مش هيأثر على العلاقة الزوجية، والحاجز محدش هيخترقوا".

موقف محرج لـ راغب علامة مع معجبه

وتابع راغب علامة راويا موقف كوميدي جمع زوجته مع إحدى المعجبات:" مرة كنت بحضر مباراة كأس العالم النهائية في إحدى الفنادق، وفي واحده دخلت بين الأمن، ووصلتلي ورمت نفسها عليا، وجيهان مراتي لأول مرة مسكتها ورمتها لورا، وكنت سعيد إن هي عملت كده والبنت تخطت حدودها بشكل كبير".

واختتم راغب علامة متحدثا عن علاقته بـ نجله خالد، قائلا:" باخد قراري بنفسي، وعندي عنصر متفاعل جدًا هو ابني خالد، وبيأثر فيا جدًا في موضوع اختيارات الأغاني والتوزيع والكلبيات، وعنده ذوق عالي جدًا، وهو من الأساسين عندي في السمع".

وتابع راغب علامة: "أحلى أوقات قضتها في حياتي بمصر، واتربيت وعشت في مصر وقت طويل، وأحلى أوقات في حياتي هنا، والمصريين أدوني أحلى ذكريات في حياتي، والانطلاقة من هنا، وسعيد بمشاركتي بالعلمين".راغب علامة في العلمين 

وأضاف معلقا على مشاركة الفنانة نانسي عجرم في حفل العلمين قائلا:" معايا الفنانة اللي بحبها نانسي عجرم، ومتشوق للجمهور، والناس بتحب تشوف الفنانين اللي بيحبوهم، وأنا ونانسي بنشبه بعض في الحفلات والجمهور بيبقى حلو وإيجابي، والمهرجان ينضم لمجموعة الذكريات الكبيرة، عندي في قلبي ووجداني إن المهرجان هيبقى له ذكريات كبيرة".

وعن الأغاني التي سيؤديها في الحفل، قال راغب علامة: "هغني كل الأغاني اللي ناس بتحبها، وأهم حاجة عملتها في حياتي إن شريط الأغاني عايش مع الناس، والحاجات اللي عملتها في التسعينات خالدة مع الجمهور، وأنا بحس بالجمهور بالأغاني، ويشعر بالجمهور كتير، وعلشان كده دايمًا الحفلة بتخلي الناس فرحانة".

واختتم راغب علامة: "لازم إحنا كفنانين نكون متجددين، وأغانينا تبقى لسه عايشة، الشغف وحب الناس سبب استمراري، وبقعد في الاستوديو بشتغل بتخيل الناس هتبقى عاملة إزاي مع الأغاني، ودايمًا بدور على الحاجات المتميزة، ولازم أتجدد مع الجيل الجديد، وأنا مش من الفنانين اللي عايز تجدد، وأنا بسمع معظم الحاجات اللي بتنزل"